वृत्तसंस्था : भारतीय रंगभूमी आणि चित्रपटसृष्टीला मोठा धक्का बसला आहे. प्रसिद्ध कन्नड रंगभूमी अभिनेते, लेखक आणि दिग्दर्शक यशवंत सरदेशपांडे यांचे वयाच्या ६० व्या वर्षी हृदयविकाराच्या झटक्याने निधन झाले. त्यांच्या अचानक जाण्याने संपूर्ण कलाविश्वावर शोककळा पसरली आहे, विशेषतः बंगळुरूमधील नाट्यक्षेत्रात.
मिळालेल्या माहितीनुसार, सरदेशपांडे अलीकडेच एका नाटकात काम करत होते आणि ते नेहमीप्रमाणेच उत्साहाने कामात व्यस्त होते. गेल्या काही काळापासून त्यांची प्रकृती ठीक नसली तरी, त्यांनी आपल्या कामावर पूर्ण लक्ष केंद्रित केले होते. रविवारी रात्री त्यांना अचानक छातीत तीव्र वेदना जाणवल्याने बंगळुरू येथील एका खाजगी रुग्णालयात दाखल करण्यात आले, पण डॉक्टरांना त्यांना वाचवता आले नाही. यशवंत सरदेशपांडे हे केवळ एक अभिनेते नव्हते, तर नाट्यविश्वातील एक मार्गदर्शक होते. त्यांनी गुरू थिएटर फाउंडेशन ची स्थापना केली, ज्याद्वारे त्यांनी अनेक तरुण कलाकारांना प्रशिक्षण दिले आणि त्यांना संधी दिली. त्यांनी त्यांच्या कारकिर्दीत १०० हून अधिक नाटके लिहिली आणि दिग्दर्शित केली, तसेच ३० हून अधिक चित्रपटांमध्येही काम केले. कन्नडसोबतच त्यांनी हिंदी आणि इंग्रजी रंगभूमीवरही मोठे योगदान दिले. त्यांच्या विनोदी आणि सामाजिक विषयांवरील व्यंगात्मक नाटकांना प्रेक्षकांनी खूप पसंती दिली होती.
