शाहपूरमधील भयानक घटना, ज्वेलर्सच्या सेल्समनवर गोळीबार; हल्ल्यात एकाचा मृत्यू

शहापूर : शनिवार रात्री शहापूरमधील पंडित नाक्यावरील महालक्ष्मी ज्वेलर्समध्ये अज्ञात हल्लेखोरांनी दिनेशकुमार मोनाराम चौधरी यांच्यावर गोळीबार केला. या हल्ल्यात २५ वर्षीय दिनेश चौधरी गंभीरपणे जखमी झाले. पोटात गोळी लागल्यामुळे त्यांना शहापूर उपजिल्हा रुग्णालयात प्राथमिक उपचार देण्यात आले आणि नंतर पुढील उपचारासाठी त्यांना ज्युपिटर हॉस्पिटलला पाठवण्यात आले. दुर्दैवाने, उपचारादरम्यान काल सकाळी त्यांचा मृत्यू झाला.
या घटनेच्या निषेधार्थ शहापूर तालुका व्यापारी मंडळाने आज शहापूर बंद पुकारला आणि आरोपींना लवकर अटक करण्याची मागणी केली. शहापूरकरांनी या बंदला उत्कृष्ट प्रतिसाद दिला. घटनेच्या विरोधात शहरातून मूक मोर्चा काढण्यात आला, जो शहापूर पोलीस ठाण्याच्या समोर जाऊन थांबला, आणि त्याठिकाणी मृत दिनेश यांना श्रद्धांजली अर्पण करण्यात आली. मूक मोर्चात आमदार पांडुरंगजी बरोरा यांनी सहभागी होऊन व्यापारी मंडळासोबत एकत्र येत निषेध व्यक्त केला. यावेळी तालुक्यातील सर्व पक्षीय नेते, पदाधिकारी, व्यापारी आणि नागरिक सहभागी झाले होते.
दरम्यान, गोळीबाराचा हेतू काय होता, याची तपासणी शहापूर पोलिसांनी सुरू केली असून, हल्लेखोरांना पकडण्यासाठी विशेष पथक तयार करण्यात आले आहे. शनिवारी रात्री घटनास्थळी डॉग स्कॉडच्या मदतीने तपास करण्यात आला.