मुंबई : ‘बिग बॉस मराठी ६’ संपल्यानंतर आता प्रेक्षकांचे लक्ष हिंदीतील लोकप्रिय वास्तवदर्शी कार्यक्रम ‘बिग बॉस २०’कडे लागले आहे. नव्या पर्वाची उत्सुकता शिगेला पोहोचली असताना कार्यक्रमासंदर्भात महत्त्वाची माहिती समोर आली आहे. अभिनेता Salman Khan पुन्हा एकदा कार्यक्रमाचे सूत्रसंचालन करताना दिसणार असून निर्मात्यांनी नव्या पर्वाच्या तयारीला वेग दिला आहे. प्रेक्षकांमध्येही सलमान खान यांना पुन्हा या भूमिकेत पाहण्याबाबत उत्सुकता वाढली आहे.
वृत्तानुसार, २१ सप्टेंबरपासून सलमान खान ‘बिग बॉस २०’च्या चित्रीकरणाला सुरुवात करणार आहेत. सध्या निर्माते स्पर्धकांची निवड आणि चाचणी प्रक्रिया राबवत असून विविध लोकप्रिय दूरचित्रवाणी कलाकारांशी चर्चा सुरू आहे. याशिवाय इतर वास्तवदर्शी कार्यक्रमांमधील काही लोकप्रिय स्पर्धकांचाही विचार केला जात असल्याची माहिती समोर आली आहे. तसेच मागील पर्वांमधील काही स्पर्धकांनाही नव्या पर्वात संधी मिळण्याची शक्यता व्यक्त केली जात आहे. कार्यक्रमाची संकल्पना आणि अंतिम स्पर्धकांची यादी लवकरच जाहीर होण्याची अपेक्षा आहे. दरम्यान, सलमान खान सध्या त्यांच्या आगामी चित्रपटांच्या चित्रीकरणात व्यस्त आहेत. १५ ऑगस्ट २०२६ रोजी त्यांचा बहुप्रतीक्षित ‘मातृभूमी’ चित्रपट प्रदर्शित होणार आहे. मागील ‘बिग बॉस १९’ पर्वाचा विजेता Gaurav Khanna ठरला होता, तर फरहाना भट्ट उपविजेती राहिली होती. आता नव्या पर्वात कोणते स्पर्धक सहभागी होणार आणि यंदाची संकल्पना काय असेल, याबाबत चाहत्यांमध्ये जोरदार चर्चा रंगली आहे.
